गोबांथार मुंख्लं आरो रुंसारि जालांनाय माखासे जोहोलाव जोहोलावजोफोरनि बाउसोमलांनायजोंसो बर’फोरा दिनैनि थासारियाव मोनफैनो हादों: दिपेन बर’
एबसुनि बारग’ गाहाइ नेहाथारि जांख्रिथाइ थान्दै महेस्वर बसुमतारीनि 21थि रुंसारि सानखौ रौतायाव थानाय बिथांनिनो आंगो गामि हातिगराव दिनै फालिदों ।
हाबाफारि बादियै फुंबिलिनि गोथार आर’जखौ जागायनानै एबसुनि फिर्फिलाखौ ससे बिरहोयो रौता दख’रा एबसुनि आफादगिरि मुस्रि दैदेनसा दैमारीया । रुंसारिनि खामफायाव बिबार बाउजेनो बिथांनिनो आंगो बिसि जनेस्वरी बसुमतारीया ।
रुंसारीनि खाम्फायाव बिबार बाउखांनानै लाखिनाय सुंद’ बिबुंथियाव मिरु एबसुनि मानावगेदेद आफादगिरि मुस्रि दिपेन बर’आ बुंङोदि जाय हारिनि सुबुंफोरा हारिनि थाखाय बाउसोमनो गिया बै हारियानो बुहुमाव गोजोरै थांनानै थानो हाबोदों होननानै गोबांथार मुंख्लं आरो रुंसारि जालांनाय जोहोलाव जोहोलावजोफोरनि बाउसोमलांनायजोंसो बर’फोरा दिनैनि थासारियाव मोनफैनो हादों बेखायनो बिथांमोनखौ अरायसम मान होलांनाया दिनै जों थांनानै थानाय साफ्रोमबो बर’सानिनो बिबान जाथारनांगौ होननानै बुंङो ।
रुंसारि सान फालिनायाव अदालगुरि जिल्ला एबसुनि आफादगिरि करनेलियास दैमारीजों लोगोसे जिल्ला आफादनि दैदेनगिरिफोक आरो ओनसोलनि रायजोफोरा बाहागो लायो ।
